قصيدة أفواج الدموع

قصيدة أفواج الدموع 

ليت بياع الورود يبيع راحه

كان أبادل كل ماعندي وأفدّي

وافرش همومي على مد المساحه

واتركه يختار وللباقي يهدّي

لي ثلاث ايام والقلب بصراحه

يشبه المكوك والافلاك ضدّي

والحنين اللي وسط روحي مراحه

ماعرفني ولافهم لاسباب صدّي

و بالجنا للشوق محراب وسراحه 

بأعتقه ان كان مايرضيه حدّي

والبخت يوم إنِّ مازمزم قراحه

راضيه لو كان ماودّه و ودّي

وموقنه للبوح في قلبي براحه

و ادري انه لايجيب ولا يودّي

واستبيحه من ثقيله مع شحاحه

والصدى لو بحّ صوتي مايردّي

قمت أعلّلني على صمت ونصاحه

منادم حروفي أخير من التردّي

وآه ياقلب ٍتواصى به جراحه

والدموع افواج والميدان خدّي

و ليت بياع الورود يبيع راحه

كان أفدّي ثم أفدّي ثم أفدّي

هند الفهيد

--------------

قصيدة ذكرى البقا / هند الفهيد

ذكرى البقا

‏خفوقي يرتعد من شايقه وكسوف

‏تعال ادري معك يالحادي علاجه

‏-

‏تعبت من الزمن يطرد على المكشوف

‏واقول الله يجيب الخير بادراجه

‏-

‏و خطوات البخت متعثّره متشوف

‏وادلّيها الوطى و يتوه منهاجه

‏-

‏على ذكرى البقا يا ‏🌸 هند ‏🌸 بك مكلوف

‏أرتــّــــب للصبر و العذر معراجه

‏-

‏واطوف بهاجسي والوقت ضيق و خوف

‏متى يالوقت تكسر باللقا سياجه

‏-

‏و حنيني يالغياب اوداعتك معروف

‏تجيبه لاصحت في خافقي حاجه!

‏-

‏واذا حجاج الهجر يختال ضيق و اوف

‏و تبيّن نيّته مع ميلة اوداجه

‏-

‏طلبتك لايعيد السالفه و ظروف

‏خذت معها الفرح والشوق وسراجه

‏⁧‫الشاعرة  #هند_الفهيد‬⁩

قصيدة حظي ردي / هند الفهيد

حظي ردي

اللي كسروا قلبي وظاموني وكفّوا يدي

الله حسبي عليهم وهو نعم الوكيل

ياربي ماني ضعيفه بس حظي ردي

ومالي عليهم غير دعوه وصبرٍ جميل

تعبـت آجرّ الحنين وفي صداه سْهدي

وانا عفيفة خفوق وذات طرفٍ يخيل

ومنهكني البوح ياحلمٍ بقلبـــي ندي

وليت الأرق جاب لي أو قدّ لاجلي سبيل

ويالشوق جب لي وصال ان كان فيها عدي

بُعد الهـقـاوي يــبـيد روحي ويهدّ حيل

أراقب الساعه وعين الحلم ترقب غدي

يالله عسى الاحلام تنبت بعد صبرٍ طويل

ويالله عسى الحزن لا من جاء يمّي يعدي

يـطـيـح في جــبّ غيــبٍ ما لـْ قاعه دليل

واللي كسروا قلبي و ظاموني وكفّوا يدي

مالي عـليـهم غـيـر دعـوه و صبرٍ جميل

و ياربي ماني ضعيفه بس حظي ردي

و الله حسبــي عليهــم وهو نعم الوكيل

الشاعرة  هند الفهيد

قصيدة اشتقت لك / هند الفهيد

اشتقت لك

اشتقت لك والفقد توّ اطنابه

ماغرّست والحب بعضه فطره

شوقٍ يعطّر خاطري باطيابه

وينفث على ثوب المعاني عطره

و ياحبني لك حب مايتشابه

حبٍ يغيث القلب قطره قطره

وياويح قلبٍ كِنّ به حسّابه

و روحٍ على زود اشتياقه خطره

واكتبه واقرا والمنى بكتابه

قصة وفا وبوح المعاني سطره

وانا عفيفة حرف درّ عتابه

و بمداحم القيفان بطره بطره

آآجيب قافٍ نادرٍ ما يابه

وكنّ السحابة تجتمع من شطره

وكل ماكتبت الشوق غرّس نابه

والكبد يا جرح العنا منفطره

واشتقت لك شوقٍ معه طلاّبه

والهجر مايلحق لقطره مطره

الشاعرة  هند الفهيد

حمام الدوح / هند الفهيد

قصيدة   حمام الدوح   

ألا ياحمام الدوح وش بك على المحزون

تحنّ وتشيل الصوت مكسور وتغني

وانا خاطري ياذا الحمايم عليه حزون

وبقلبي من الآمال خنجر ويطعني

دفنت بيديني حلمي الباكي المسكون

بارواح مازالت تناديني وتمنّي

وجرّيت سيّور الأماني أبيها تهون

سحب خافقي وارداه مكسور ويحنّي

ألا يالحمام الراعبي مابقى لي لون

بهتّ وبهت لون الرجا و خايبٍ ظنّي

حنينك يجرّ احزون من بوحي الموزون

ويغنّي معك والحزن لا ضاقت يغنّي

واشوفك تجر لحونك بخافقي وتمون

و أحسّ اللحون بصوتك العذب يلحنّي

تريّث ترا كثر الحناين تجرّ لحون

تزيد الحزون وتردف الضيق وتعنّي

و خِف ربك بقلبٍ عليه الحزون ردون

عفيف و رجاه احلام من عمر يجْفنّي

أحمّلك لامن رحت وسط الفضا ميمون

حنينٍ غفى في خافقي وْ وصّله منّي

وقل للذي له : ياحنيني أبيك تصون

شعوري وعنّك ياحنيني تطمنّي

وقلّه عن احساسٍ هنا بالجنا مدفون

وعن عـْيون تسهر بلّغ أشواقها عنّي

وألا يالحمام الساجع اللاهي المظنون

تـرفّـق بقلبٍ كلّ ما حنّ له ونّي

الشاعرة هند الفهيد

كفوف النداوي / هند الفهيد

قصيدة    كفوف النداوي

الدلع والشوق وكفوف النداوي

حلم ربـّات الترف والكل بالله

ولو جنى بوحي السميرا مايداوي

جرحٍ بصدري بعث بي ألف علّه

ياكسير الروح و قليبك هواوي

لاتحسب القلب لا كبّر وصلّى هـ

انه يداوي وعلى الاشواق قاوي

لا ولا والله ، و عسى وقلّه لعلّه

وكان ساعي الشوق للهجران ناوي

قلـّه كتاب الهوى خله بـِ حِلّه

وقله الحلم المعنّى بـ قلب غاوي

مايموت وصاحبه بالصبر سلّه

والمنى صبّار واشواكه عراوي

و بْيدين الصبر معقوده و حلّه

والرجا بالله وقلب الياس خاوي

دام همال الأمل يشفي بـ غله

ولا تعلل بالهقاوي بقلب ذاوي

إما تجبرها وإلاّ قل لا والله

وياغريب الروح ملجرحك مداوي

دام بوحك زاد طين الجرح بلّه

جيت واحساسك مع السرحان عاوي

و رحت والحلم الغضي من غير ملّه

والولع والموق وايدين المناوي

عينها للحلم واحساسه و ظلّه

قمت أباريهم وقلبي به رجاوي

والرجا بـــ الله ولا غيره يحلّه

الشاعرة هند الفهيد

قصيدة نوح ورقا / هند الفهيد

قصيدة   نوح ورقا

بريِ حال اللي غريبه في دياره

ِيطرب السمار نوحه، نوح ورقا

و كل ماحنّت نشا بالجوف ناره

ولو تنادي بالصدى صيّاح فرقا

و ليت عمرٍ فات ِمعطيني إماره

كان ماشفت العنا بالروح يرقا

و كان ماولّى على بخس وخساره

مِتعب اشعوري معه لا انزل ولا ارقى

وليت ياطيفٍ سرى بيده شراره

زارني قبل الفوات و ساق برقا

و آهي أكســــرها واغنيها وتاره

تحطب ضلوعي وهي تنزل وترقا

وآه أدوزنها على جروحي بطاره

وتاخذ احساسي معه غربٍ وشرقا

و قلـــــتها والقلب ياكل منه ثاره

و عيني بدمع الرجا والشوق غرقا

آخر احلامي حنيني وشوف داره

وأول ايام الــــمنى لا عاد طرقا

الشاعرة  هند الفهيد