قال المثل إنّ الوجع بالضرس
قلت الوجع بالحال وبـْجيله
قال الزمن غيّر معان ٍ خرس
قلت الزمن ماله بنا حيله
شفت الابو ضايع يبي له كورس
بالتربيه ، لاهي وْ رجاجيله
والام بين السوق ولا العرس
ولاّ تجمّع في معاميله
البنت صارت لاحكوا بالعرس
تضحك وترفع بالرضا الشيله
واطفالنا ماحسّبوا للدرس
واهمومهم مشوار هالليله
والغرب تنخاهم عيون الفرس
وحنا نغني وللهوا ميله
وضرس العدا من حولنا له ضَرس
ودّه علينا يعيد تأويله
الله يرد كيد العداة الشرس
وينعم علينا ابجود تسهيله
ويارب قوّم طايحات الغرس
والشر يالله يالولي تزيله
